Супрацоўнікі інстытута прынялі ўдзел у канферэнцыі «АГРАКІРАВАННЕ»

14 сакавіка 2025 г. адбылася канферэнцыя «АграКіраванне», у рамках якой Інстытут сістэмных даследаванняў у АПК НАН Беларусі быў прадстаўлены як адзін з асноўных партнёраў арганізатара мерапрыемства – кампаніі “ЮКОЛА-ІНФА-Брэст” – найбуйнейшага прадстаўніка “1С” у Беларусі.

У канферэнцыі прынялі ўдзел А. У. Піліпук, А. П. Такун, А. М. Гарбатоўская, А. В. Гарбатоўскі, С. П. Такун, А. Г. Лобан, А. М. Валаховіч, М. А. Капаеў.

Дырэктар А. У. Піліпук выступіў з дакладам “Эфектыўнасць укаранення і выкарыстання лічбавых сістэм у сельскагаспадарчай вытворчасці”.

У ходзе абмену думкамі і разгляду магчымасцей выкарыстання лічбавых тэхналогій у сельскай гаспадарцы ўдзельнікі канферэнцыі праявілі цікавасць да распрацовак інстытута ў сферы цыфравізацыі айчыннага АПК і актыўна паўдзельнічалі ў анкетным апытанні.

Анкетнае апытанне паказала наступныя вынікі:

1. У сферы цыфравізацыі раслінаводства найбольш распаўсюджанымі інструментамі з'яўляюцца:

- інфармацыйныя сістэмы кантролю тэхнікі (79 % апытаных);

- сістэмы паралельнага ваджэння і аўтапілатавання (каля 38 %);

- электронныя карты палёў (46 %).

Пры гэтым многія рэспандэнты яшчэ не выкарыстоўваюць, але зацікаўлены ў прымяненні БПЛА, а таксама дыферэнцыраванага ўнясення ўгнаенняў і сродкаў аховы раслін.

2. У жывёлагадоўлі адзначаюцца высокая ступень аўтаматызацыі працэсаў даення з прымяненнем адпаведных інфармацыйных сістэм і абсталявання (64 % апытаных), значная доля сельгасарганізацый, якія прымяняюць праграмнае забеспячэнне для кіравання кармленнем і аптымізацыі рацыёнаў (50 %), аднак пакуль недастатковае выкарыстанне сістэм па заатэхнічным уліку і аптымізацыі працы ветэрынарных спецыялістаў, асеменатараў (36 і 7 % апытаных).

3. У галіне цыфравізацыі кіравання сельскагаспадарчыя прадпрыемствы актыўна выкарыстоўваюць сістэмы аўтаматызацыі бухгалтарскага ўліку (каля 80 % апытаных), але пакуль недастаткова: праграмныя комплексы аўтаматызацыі бізнес-планавання – усяго 7 % рэспандэнтаў, аднак праяўляюць да дадзеных сістэм значную цікавасць –  62 %.

4. Рэспандэнты таксама выказалі сваё меркаванне аб мерах, неабходных для актывізацыі працэсаў цыфравізацыі ў сельскагаспадарчых арганізацыях:

- атрыманне мэтавых субсідый і льготных крэдытаў (43 % апытаных);

- інтэграцыя інфармацыйных сістэм кіравання раслінаводствам і жывёлагадоўляй з сістэмамі аўтаматызацыі бухгалтарскага ўліку (40 %);

- распрацоўка стратэгіі лічбавага развіцця прадпрыемства (29 %).